8 Gjërat që nuk Duhet t’i Thoni Asnjëherë në një Intervistë Pune

Intervista e punës është një ndër momentet më vendimtare në procesin e rekrutimit. Është mundësia juaj ku mund të tregoni se kush jeni përtej CV-së, mënyrën se si komunikoni, çfarë vlerash keni dhe sa mirë përshtateni me kulturën e kompanisë. Por përderisa shumë kandidatë përqendrohen te ajo që duhet të thonë, shpeshherë harrojnë se ka edhe gjëra që nuk duhet t’i thonë asnjëherë.

Disa shprehje apo komente edhe kur thuhen me qëllim të mirë, mund të lënë përshtypje të gabuar dhe të ndikojnë negativisht në vendimin e punëdhënësit. Pavarësisht nëse aplikoni për punën tuaj të parë apo për një pozitë drejtuese, kujdesi në komunikim është thelbësor.

Më poshtë gjeni 8 gjëra që nuk duhet t’i thoni asnjëherë në një intervistë pune dhe pse është kaq e rëndësishme t’i shmangni ato.

1. Të flisni keq për punëdhënësin apo kompaninë e mëparshme

Të flisni keq për punëdhënësit ose kompaninë ku kemi punuar më herët mund të tingëllojë si diçka e thënë sinqerisht, por në realitet ju po leni një përshtypje keqe tek intervistuesi. Intervistuesit mund të shqetësohen se mund të sillni negativitet në ekip ose se në të ardhmen do të flisni njësoj për ta.

Në vend të kësaj, përqendrohuni në mënyrë profesionale te përvojat e mëparshme, theksoni se çfarë keni mësuar dhe si jeni zhvilluar si profesionistë. Nëse keni kaluar një përvojë të vështirë, mund të thoni se po kërkoni një ambient më bashkëpunues ose një vend pune që përputhet më mirë me vlerat tuaja.

2. “Nuk e di”

Askush nuk pret që ju t’i dini të gjitha përgjigjet, por një reagim i shpejtë dhe i thatë si “nuk e di” mund të lërë përshtypjen se nuk jeni të interesuar ose nuk keni shkathtësi për analizimin dhe  reflektimin në një situatë.

Në vend të kësaj, provoni të thoni: “Është një pyetje e mirë, më lejoni të mendohem pak.” Ose: “Nuk kam hasur ende një situatë të tillë, por ja si do të veproja…” Kjo tregon gatishmëri për të mësuar dhe aftësi të mirë për të zgjidhur probleme.

3. “Është në CV”

Një përgjigje si kjo mund të tingëllojë e ftohtë apo edhe përçmuese. Intervistuesit nuk pyesin sepse nuk kanë lexuar CV-në, por sepse duan të dëgjojnë mënyrën se si ju përshkruani përvojat dhe arritjet tuaja me fjalët tuaja.

Shfrytëzojeni këtë si një mundësi për t’u thelluar në pikat e CV-së suaj ku mendoni se është më e rëndësishme, tregoni ndikimin që keni pasur dhe lidhni përvojën e mëparshme me pozitën që synoni.

4. Përdorimi i zhargonit ose i gjuhës jo profesionale

Nuk ka nevojë të jeni shumë formalë, por përdorimi i zhargonit, fjalëve të rrugës apo shprehjeve të papërshtatshme mund të tregoj po ashtu mungesë edukate dhe respekti dhe të lë përshtypjen se nuk jeni mjaft seriozë për pozitën e caktuar.

Synoni një stil komunikimi të qartë, të sjellshëm dhe profesional, gjithmonë duke qenë natyral dhe autentik, pa u munduar të bëheni dikush tjetër.

5. “Nuk kam asnjë pyetje”

Kur ju pyesin në fund të intervistës “A keni ndonjë pyetje për ne?”, një përgjigje si “Jo nuk kam” mund të japë përshtypjen se nuk jeni mjaft të angazhuar apo të interesuar për pozitën. Nëse nuk bëni pyetje ju humbni mundësinë të tregoni interesin tuaj për vendin e punës.  

Përgatitni disa pyetje përpara intervistës, për shembull rreth ekipit, mënyrës së punës ose mundësive për zhvillim profesional në kompani.

6. Të pyesni: “Çfarë bën kompania juaj?”

Të shkoni pa u informuar për gjërat bazike në lidhje me kompaninë në të cilën aplikoni tregon mungesë përgatitjeje. Në kohën e sotme, me një kërkim i thjeshtë online ju do të gjeni informata në lidhje me misionin, shërbimet dhe zhvillimet e fundit të kompanisë.

Në vend që të pyesni për gjëra që janë lehtësisht të qasshme, tregoni që keni bërë kërkimin tuaj dhe bëni komente ose pyetje më të thelluara për këtë gjë.

7. Të flisni për pagën në fillim të intervistës

Edhe pse është temë e rëndësishme, nëse e hapni këtë temë që në fillim, mund të jepni përshtypjen se jeni të interesuar vetëm për pagesën dhe jo për vetë rolin apo kompaninë. Është më e përshtatshme ta diskutoni pagën në fazat e mëvonshme të procesit, kur palët kanë shprehur interes të ndërsjellë për bashkëpunim.

8. Të dukeni të dëshpëruar

E kuptueshme që të keni me të vërtetë nevojë për punë dhe kërkimi i punës të jetë stresues, por shprehjet që mund të shfaqin dëshpërimin tuaj mund të krijojnë shqetësim apo parehati te intervistuesi. Pavarësisht situatës, përpiquni të ruani profesionalizmin dhe të përqendroheni në atë që ju motivon për këtë pozitë.

Flisni për vlerat e përbashkëta që keni me kompaninë, për dëshirën për të kontribuar dhe për zhvillimin që kërkoni, në vend të shfaqni lutje emocionale.

Përfundim

Intervista e punës është më shumë sesa një test i njohurive, është një pasqyrë e mënyrës se si komunikoni, si reflektoni dhe si prezantoni veten në situata formale. T’i shmangni këto shprehje të zakonshme është një hap i rëndësishëm drejt ndërtimit të një përshtypjeje pozitive.

Nuk është e nevojshme të jeni perfekt, mjafton të tregoni përgatitje, vetëdije dhe qëndrim profesional. Duke ditur çfarë nuk duhet të thoni, ju e keni më të lehtë të thoni shprehjet e duhura që do t’ju sigurojnë vendin e punës.