Çfarë Kërkojnë Punëdhënësit Përtej një CV-je të Mirë? 8 Gjëra që Duhet t’i Keni Parasysh

Kur jeni duke kërkuar punë, është e lehtë të fokusoheni vetëm në CV-në tuaj, t’i rishikoni pikat kryesore, ta formatoni dhe t’i zgjidhni fjalët e duhura. Përderisa një CV e hartuar mirë është thelbësore, është vetëm një pjesë e historisë.

Shumë punë kërkues nuk e kuptojnë se çka ndodh pasi CV-ja juaj ju fut në derë është pjesa që ka vërtet rëndësi. Punëdhënësit sot janë të vërshuar me aplikime të kandidatëve të kualifikuar. Ajo që e ndihmon një kandidat të dallohet rrallë është vetëm arsimi ose përvoja, më shumë janë gjërat që nuk mund t’i prekni. Ana njerëzore. Mënyra se si mendoni, veproni, mësoni dhe bashkëpunoni.

Pavarësisht nëse po aplikoni për punën tuaj të parë apo të pestën, këtu janë tetë tipare kryesore që punëdhënësit kërkojnë vazhdimisht dhe që shkojnë përtej asaj që paraqitni në CV-në tuaj:

1. Përshtatshmëria

Vendet e punës në ditët e sotme po evoluojnë më shpejt se asnjëherë më parë. Prandaj për këtë arsye përshtatshmëria renditet lart në listën e dëshirave të çdo rekrutuesi.

Punëdhënësit kërkojnë kandidatë që mund të qëndrojnë fleksibil, të përshtaten shpejt dhe të ruajnë performancën edhe kur gjërat nuk shkojnë sipas planit. Punonjësit që përshtaten janë shpesh më inovativ dhe të aftë të përballojnë përgjegjësi të shumëfishta.

2. Shkathtësitë e Komunikimit

Shkathtësitë e komunikimit janë thelbësore në pothuajse çdo rol dhe jo vetëm për pozitat që kanë kontakt të vazhdueshëm klientët. Komunikimi ka të bëj me shprehjen e qartë të ideve, të dëgjuarit aktiv, përgjigjen me respekt dhe përshtatjen e mesazhit me audiencën tuaj.

Punëdhënësit vëzhgojnë se si komunikoni gjatë gjithë procesit: në CV-në tuaj, në email-et dhe veçanërisht gjatë intervistës. Ata nuk shikojnë vetëm atë që thoni, por edhe mënyrën se si e thoni.

3. Qëndrim Pozitiv

Një qëndrim pozitiv dhe një mentalitet i "unë mund t’ia dal" është një nga cilësitë më të nënvlerësuara, por më me ndikim në vendin e punës. Ndikon në mënyrën se si i qaseni detyrave, merrni feedback, përballoni sfidat dhe bashkëveproni me kolegët.

Askush nuk dëshiron të punojë me dikë që ankohet vazhdimisht ose dorëzohet përballë sfidave. Një mendësi konstruktive ju vendos në një disponim më të mirë, angazhim më të lartë në ekip dhe bashkëpunim më produktiv.

4. Përshtatshmëria Kulturore

Çdo kompani ka një kulturë unike: vlerat e saj, mjedisin e punës dhe dinamikën e ekipit. Menaxherët e punësimit vlerësojnë gjithmonë nëse personaliteti, sjelljet dhe stili i punës së një kandidati përputhen me atë kulturë.

Kjo nuk do të thotë të ndryshoni atë që jeni. Do të thotë të gjeni përputhje të ndërsjellë. A do të mund të zhvilloheni në një startup me ritëm të shpejtë? Apo do të shkëlqeni në mjedise të strukturuara dhe të drejtuara nga procesi?

Këshillë: Hulumtoni për misionin, vlerat dhe praninë e kompanisë në mediat sociale. Gjatë intervistës, reflektoni se si vlerat tuaja personale lidhen me ato të kompanisë.

5. Inteligjenca Emocionale (EQ)

Inteligjenca emocionale është aftësia juaj për të kuptuar emocionet tuaja, për t'u përgjigjur me empati ndaj të tjerëve, për të menaxhuar stresin dhe për të lundruar në kompleksitetet sociale. Është veçanërisht e rëndësishme në rolet që kërkojnë punë ekipore, lidership ose ndërveprim me klientët.

Kandidatët me nivele të larta të kësaj inteligjence janë më të mirë në zgjidhjen e konflikteve, ndërtimin e marrëdhënieve dhe qëndrimin e qetë nën presion, të gjitha cilësi në të cilat punëdhënësit mbështeten për të mbajtur një vend pune të shëndetshëm.

6. Iniciativa

Punëdhënësit i duan njerëzit që marrin iniciativë, ata që dalin përpara, marrin përgjegjësi dhe shkojnë përtej asaj që kërkohet. Kjo veçori sinjalizon motivim, kreativitet dhe pavarësi, të cilat janë cilësi që kursejnë kohë dhe i shtojnë vlerë çdo ekipi.

Qoftë propozimi i një ideje të re, zgjidhja e një problemi që askush nuk ju kërkoi ta zgjidhnit apo të dalurit vullnetar një sfidë, iniciativa bie në sy.

7. Shkathtësi për Zgjidhjen e Problemeve

Në çdo punë mund të paraqiten probleme qofshin ato çështje të vogla të përditshme apo sfida më të mëdha strategjike. Punëdhënësit duan të dinë: kur diçka prishet ose nuk funksionon, a prisni udhëzime apo përpiqeni ta rregulloni?

Zgjidhësit efektivë të problemeve mendojnë në mënyrë kritike, qëndrojnë të qetë, analizojnë situatën dhe propozojnë zgjidhje. Edhe nëse nuk i keni të gjitha përgjigjet, është me rëndësi të tregoni një qasje të orientuar drejt procesit.

8. Gatishmëria për të Mësuar

Pavarësisht se sa përvojë keni, gatishmëria për të mësuar vazhdimisht është një përparësi kryesore për ekipet e punësimit. Ajo ka të bëj me dëshirën të fitoni njohuri dhe të zhvilloheni me qëllim ta përmirësoni performancën tuaj në punë.

Të demonstrosh gatishmëri për të mësuar është një mënyrë e shkëlqyer për të vërtetuar përkushtimin tënd ndaj një kompanie ose roli. Marrja përsipër e më shumë përgjegjësive ose përmirësimi i kualifikimeve të tua mund të çojë në mundësi avancimi, rritje page ose ngritje në detyrë.

Me ndryshimet e shpejta të industrisë, kompanitë kanë nevojë për njerëz që janë kuriozë, të hapur ndaj feedback-ut dhe të etur për t'u zhvilluar.

Përfundimi

CV-ja juaj ju bën të viheni re nga punëdhënësit, personaliteti dhe shkathtësitë e buta ju punësojnë.

Një CV e fuqishme mund t'ju siguroj intervistën, mirëpo ajo kush jeni ju, jo vetëm ajo që keni bërë ju siguron punën. Shkathtësitë e buta si përshtatshmëria, komunikimi, iniciativa dhe inteligjenca emocionale janë avantazhi i ri konkurrues. Në një botë që drejtohet gjithnjë e më shumë nga inteligjenca artificiale dhe automatizimi, janë tiparet tuaja njerëzore ato që do t'ju dallojnë.

Pra, ndërsa përgatiteni për mundësinë tuaj të ardhshme mos e përditësoni vetëm CV-në tuaj por përditësoni edhe mënyrën tuaj të të menduarit.