Situatat më të papërshtatshme për të lënë punën

Largimi nga puna nuk është kurrë i thjeshtë. Ndonjëherë është vendimi më i shëndetshëm dhe më i mençur që mund të marrësh. Por herë të tjera, koha ose rrethanat mund ta bëjnë dorëheqjen të duket e nxituar, madje edhe të dëmshme. Jo vetëm për kompaninë ku punoni, por edhe për reputacionin tuaj profesional dhe stabilitetin personal.

Pra, kur nuk është momenti i duhur për të dhënë dorëheqje? Ja disa situata që duhet t’i mendoni mirë para se të tërhiqeni.

1. Gjatë një projekti të madh

Të largoheni në mes të një projekti apo para një afati të rëndësishëm nuk prish vetëm planet. E lë ekipin tuaj në vështirësi, ul motivimin dhe krijon përshtypjen se nuk mund t’i përballoni momentet me presion.

Punëdhënësit, madje edhe punëdhënësit e ardhshëm, zakonisht e mbajnë mend dikë që është “dorëzuar” në kohë kritike. Nëse mendoni të largoheni, shpesh është më mirë ta çoni projektin deri në fund ose të prisni një moment tranzicioni më të natyrshëm.

2. Menjëherë pas një ngritjeje në detyrë ose në page

Një ngritje në detyrë apo në page është shenjë besimi dhe investimi tek ju. Dorëheqja menjëherë pas saj nuk ju vendos në një pozitë të lakmueshme.

Jo vetëm që shihet si jo profesionale, por mund të ju kushtojë edhe në rekomandime të ardhshme. Punëdhënësi mund të mendojë se e keni përdorur promovimin si mjet për të arritur tek një rol tjetër. Edhe nëse vendimi juaj është i drejtë, koha ka rëndësi. Zakonisht është më e arsyeshme të qëndroni mjaftueshëm për të treguar përkushtim para se të lëvizësh.

3. Gjatë një recesioni ekonomik

Recesionet sjellin ngecje në punësim, numër më të vogël të vendeve të punës dhe shumë pasiguri në treg. Largimi pa pasur një pozitë tjetër të sigurt gjatë këtyre periudhave është i rrezikshëm, edhe financiarisht edhe emocionalisht.

Gjetja e një pune të re, mund të zgjasë shumë më tepër nga sa mendojmë, sidomos kur konkurrenca është e madhe. Nëse nuk ke një “rrjet sigurie” të fortë ose një ofertë të garantuar, zakonisht është më e preferueshme të prisni.

4. Në fillim të një roli të ri

Shpesh ndodh që pas disa javësh në një punë të re, gjërat të mos duken siç i kemi menduar. Megjithatë, largimi shumë shpejt krijon “red flags” në CV. Punëdhënësit mund të ju shohin si të paqëndrueshëm ose me mungesë stabiliteti.

Roli i ri ka nevojë për kohë, muaj jo javë që të përshtateni dhe të jepni rezultat. Përveç rasteve kur ambienti është toksik ose i dëmshëm, është e rëndësishme të tregoni stabilitet dhe aftësi për të kaluar sfida para se të merrni një vendim.

5. Gjatë sfidave dhe planeve personale ose familjare

Kur përballesh me sfida personale si probleme shëndetësore, emergjenca familjare apo ndryshime të mëdha në jetë, lënia e punës shpesh shton stresin. Dorëheqja në këtë kohë mund të sjellë paqëndrueshmëri financiare dhe presion më të madh.

Nëse jeni duke filluar një kredi, planifikuar një dasmë apo përgatitur për një shpenzim të madh, dorëheqja nga vendi i punës i qëndrueshëm pa pasur një alternativë të sigurt shton rrezikun. Ndonjëherë, të qëndroni në një pozitë (edhe nëse është përkohësisht) ju jep strukturë, të ardhura dhe një lloj stabiliteti derisa të menaxhoni situatën personale.

6. Pa dhënë njoftim paraprak

Dorëheqja e menjëhershme ose pa dhënë njoftim të mjaftueshëm pothuajse gjithmonë dëmton reputacionin tuaj. Në Kosovë, si në shumë vende të tjera, praktika e zakonshme është dy javë njoftim.

Kjo i jep kohë kompanisë dhe juve po ashtu, të bëni një tranzicion të qetë dhe tregon respekt për kolegët. Shmangia e këtij hapi shpesh mbyll dyer dhe në një treg të vogël pune, lajmi mund të përhapet shpejt.

7. Pa një plan konkret

Të lini punën vetëm sepse ndjeheni të pakënaqur, pa pasur një bazë si kursime, oferta të tjera të punës apo pa një plan të qartë, shpesh sjell paqëndrueshmëri. Realiteti është që faturat nuk ndalen vetëm pse ke nevojë për pushim.

Para se të largoheni, sigurohuni që keni vlerësuar financat, përditësuar CV-në, zgjeruar rrjetin dhe menduar hapat e ardhshëm. Një tranzicion i planifikuar është pothuajse gjithmonë më i mirë se një vendim impulsiv.

8. Kur je i djegur nga lodhja (burnout)

Burnout është realitet dhe është arsye e fortë për t’u larguar. Por marrja e një vendimi të madh në momentin kur jeni të rraskapitur nuk është e mençur.

Para se të jepni dorëheqje, provoni alternativa si: disa ditë pushim, rishikim të ngarkesës së punës ose të bisedoni të hapur me menaxherin tuaj. Shpesh lodhja menaxhohet pa qenë nevoja të largoheni. Nëse edhe pas rimëkëmbjes mendoni se duhet të largoheni, do ta bëni me mendje të qartë.

9. Në moment zemërimi ose frustrimi

Dorëheqja menjëherë pas një takimi të keq apo një debati rrallë sjell gjëra të mira. Vendimet emocionale prishin marrëdhëniet profesionale afatgjata dhe kufizojnë opsionet tuaja të ardhshme.

Pritni të kaloj pak kohë dhe nëse ende mendoni se largimi është zgjidhja, do ta bëni në mënyrë më të qetë dhe profesionale.

Përfundim

Largimi nga puna nuk është vendim që merret njësoj në çdo situatë. Ka raste kur është i domosdoshëm për shembull, në një ambient toksik ose ku vlerat e tua nuk respektohen.

Por koha kur largohuni ka po aq rëndësi sa arsyeja pse dëshironi të largoheni

Çelësi është përgatitja në këto pyetje.

• A jam financiarisht gati?

• Kam një plan të qartë?

• A është ky momenti i duhur, apo disa muaj pritje do ta ndryshonin situatën?
  

Të jeni të qëllimshëm kur largoheni, jo vetëm që mbron karrierën tuaj por siguron që hapi i radhës të jetë përpara, jo mbrapa.