7 Shenjat që po punon më shumë seç duhet

Të punosh fort është vlerë. Të ndihmon të zhvillosh karrierën, të arrish synime dhe të fitosh besimin e ekipit. Por ndonjëherë, pa e kuptuar, ritmi i punës fillon të të rëndojë fizikisht dhe mendërisht. Kur e kalon këtë vijë të hollë, performanca dhe mirëqenia jote personale merr goditje.

T’i njohësh shenjat në kohë të ndihmon të rregullosh stilin e punës, të rivlerësosh prioritetet dhe të kujdesesh për veten – që në fund të punosh më mirë, jo më shumë.

1. Punon orë të gjata çdo ditë

Nëse shpesh po rri pas orarit, po dërgon email nga shtëpia dhe po e gjen veten me më pak kohë për familjen, miqtë dhe veten, ndoshta ritmi nuk po të shërben më. Mund të ndihmojë shumë të vendosësh një kufi të qartë: mbrëmjet pas punës i dedikohen pushimit. Nëse pozita kërkon të jesh i disponueshëm pas orarit, njofto kontaktet për oraret kur je online – pjesën tjetër lëre kompjuterin në një dhomë tjetër dhe shkëpute mendjen.

2. Merr mbi vete më shumë përgjegjësi se kolegët

Etika e mirë e punës është vlerë, por kjo nuk do të thotë të marrësh gjithçka vetë. Udheheqësit efektivë delegojnë. Ata ndajnë punën në mënyrë të balancuar dhe fokusohen aty ku sjellin më shumë vlerë. Nëse ti dhe ekipi yt po punoni vazhdimisht jashtë orarit, ndoshta është momenti të ngritësh çështjen te menaxheri – mund të nevojiten më shumë burime apo njerëz për të përballuar volumin.

3. Vendos vetëm qëllime që lidhen me karrierën

Ambicia profesionale është e rëndësishme, por nëse gjithë energjia jote shkon vetëm te puna, pjesa personale mbetet bosh. Balanca vjen kur vendos edhe synime jashtë punës: shëndet, hobi, marrëdhënie sociale. Edhe diçka e thjeshtë si një grup hiking-u me kolegët mund të sjellë më shumë harmoni, bashkëpunim dhe kënaqësi përditë.

4. Mendon për punën gjatë gjithë kohës

Pak reflektim ndihmon. Por kur puna bëhet mendimi i vetëm, atëherë pushimi zhduket. Zgjidh një kohë të caktuar për t’u marrë me mendimet e ditës – për shembull gjatë rrugës për në shtëpi. Vendos timer, reflekto pak për të mirat dhe për çfarë mund të përmirësosh, pastaj ndrysho fokus: muzikë, bisedë, një aktivitet që të ndihmon të shkëputesh.

5. Flet vetëm për punën

Është krejt normale të ndash histori nga puna, por kur çdo bisedë rrotullohet rreth saj, lidhjet me njerëzit fillojnë të bëhen sipërfaqësore. Pyeti të tjerët për jetën e tyre, projektet e tyre, gjërat që i interesojnë. Edhe vetë provo të tregosh histori personale, jo vetëm profesionale.

6. Puna po ndikon në humorin dhe mënyrën si e sheh jetën

Ditë të vështira ka gjithmonë. Por nëse pothuaj çdo ditë po të sjell lodhje mendore, irritim apo stres të vazhdueshëm, është një sinjal i qartë. Disa hapa që mund të ndihmojnë:

• përmirësimi i marrëdhënieve në punë

• bisedë me menaxherin për mënyra rritjeje të produktivitetit ose reduktim ngarkese

• kohë për t’u çlodhur pas orarit

• aktivitete sociale që të mbajnë të lidhur me njerëzit e tu

  
  

7. Nuk po merr pushime fare

Pushimi nuk është luks – është pjesë e domosdoshme e mirëqenies. Edhe një ditë e vetme larg punës mund të të rikthejë fokusin dhe të të ndihmojë të kuptosh çfarë të duhet në të vërtetë. Planifiko pushimet në periudha më të qeta, rreth festave ose evenimenteve familjare, ose thjesht kur ndjen se duhet të ndalesh pak.

Në fund, kujdesi për veten nuk të bën më pak profesionist, të bën më të qëndrueshëm, më kreativ dhe shumë më efektiv.