Si ta Filloni me Sukses një Punë të Re? 8 Strategji që Mund t'i Aplikoni

Fillimi i një pune të re është gjithmonë emocionues, por shpesh mund të duket edhe i mbingarkuar, sidomos kur jeni ende në fazat e para të karrierës. Edhe nëse nuk është pozita juaj e parë, kur hyni në një ambient të ri pune ka pritshmëri, përgjegjësi dhe mundësi të reja. Mënyra se si i menaxhoni javët dhe muajt e parë mund të përcaktojë ritmin e suksesit dhe zhvillimit tuaj afatgjatë.

Këtu janë disa hapa praktikë që do ta bëjnë kalimin më të lehtë dhe më efektiv.

1. Hulumtoni Industrinë dhe Kompaninë

Para se të shkoni në ditën e parë, merrni kohë të kuptoni pamjen e përgjithshme. Hulumtoni jo vetëm industrinë, por edhe se si kompania është e pozicionuar në treg. Ky këndvështrim ju ndihmon të kuptoni prioritetet dhe sfidat e saj.

Po aq e rëndësishme është të njiheni me produktet apo shërbimet e kompanisë. Të dish çfarë ofron realisht kompania ju jep një bazë më të fortë që të kuptuar rolin tuaj brenda saj.

2. Kuptoni Kulturën e Kompanisë

Çdo vend pune ka ritmin e vet qoftë ai formal apo joformal, të strukturuar apo fleksibil, me dinamikë të shpejtë apo më të ngadaltë. Kushtoni vëmendje mënyrës se si merren vendimet, si komunikojnë ekipet dhe edhe detajeve të vogla si etika në mbledhje.

Kultura e një kompanie rrallë shkruhet në manuale, ndaj vëzhgoni me kujdes. Anëtarët e ekipit, a ndajnë idetë hapur gjatë takimeve apo më shumë komunikojnë individualisht? A pritet nga ju që email-eve t’ju përgjigjeni edhe pas orarit, apo respektohet balanca punë-jetë? Kuptimi i këtyre rregullave të pashkruara ju ndihmon të shmangni gabime të hershme dhe të përshtateni më shpejt.

3. Rishikoni Përshkrimin e Punës dhe Objektivat

Shumë shpesh pas punësimit, përshkrimi i pozitës për të cilën keni aplikuar lihet mënjanë, por rikthimi tek ajo ju mban të lidhur me pritjet e qarta. Lexoni edhe një herë përgjegjësitë dhe objektivat dhe ndoshta diskutoni me menaxherin tuaj.

Shkoni edhe një hap më tej: sqaroni se si do të matet suksesi juaj. A priten rezultate konkrete brenda 3 muajve apo fokusi fillestar është të kuptoni proceset përpara se të merrni përgjegjësi të plota? Kuptimi i pritjeve dhe mënyra e vlerësimit të performancës ju ndihmon t’ju jepni prioritet gjërave të duhura dhe të shmangni veprimet e gabuara.

4. Mundohuni të Njiheni me Ekipin tuaj të Ri

Aftësitë teknike janë të rëndësishme, por marrëdhëniet me kolegët shpesh ndikojnë po aq shumë në suksesin tuaj. Ndërtimi i lidhjeve që nga fillimi ju ndihmon të integroheni më lehtë dhe të kuptoni dinamikat e brendshme të ekipit. 9

Merrni iniciativën për të prezantuar veten, pyesni për projektet e kolegëve dhe tregoni interes për punën e tyre. Po ashtu mos harroni, besimi ndërtohet me vazhdimësi. Jini të besueshëm, përmbushni premtimet dhe tregoni mirënjohje kur merrni mbështetje.

5. Identifikoni Palët Kyçe

Përveç ekipit të drejtpërdrejtë, ka individë apo departamente të tjera që ndikojnë në punën tuaj, menaxherë të tjerë, drejtues projektesh apo partnerë të jashtëm. Njihni kush janë ata që në fillim.

Po ashtu, kuptoni pritjet e tyre dhe mënyrat e preferuara të komunikimit. A preferojnë raporte të shkurtra me email apo diskutime të detajuara në takime? Kuptimi i këtyre preferencave e bën bashkëpunimin më të rrjedhshëm dhe mund të jetë vendimtar për suksesin tuaj.

6. Krijoni një Plan 90-Ditor

Një punë e re mund të duket si një lumë informacioni dhe detyrash. Një plan i strukturuar 90-ditor ju jep qartësi. Ndajeni në tre faza:

• 30 ditët e para: Mësoni. Vëzhgoni, dëgjoni dhe bëni pyetje.

• 30 ditët e dyta: Kontribuoni. Merrni pjesë në projekte të vogla ku mund të shtoni vlerë.

• 30 ditët e fundit: Dorëzoni. Synoni të përfundoni një detyrë apo projekt domethënës që tregon aftësitë tuaja.
  

7. Bëni Pyetje

Nuk pritet të dini gjithçka. Përkundrazi, bërja e pyetjeve të menduara tregon se jeni të përfshirë. Në vend që të qëndroni të qetë dhe të rrezikoni gabime, kërkoni sqarime.

Pyetjet e mira janë të qarta: “Dëshironi të ndaj përditësime çdo ditë apo çdo javë?” ose “Kë duhet të përfshij kur dërgoj këtë draft?”

Gjithashtu, përdorni pyetjet për të kuptuar rrjedhën e punës dhe proceset. Familjarizimi me rrjedhën e punës në kompani, do t’ju ndihmojë të bëni punën tuaj në mënyrën më të mirë të mundshme.

8. Tregoni Vetë-Iniciativë

Punëdhënësit vlerësojnë punonjësit që nuk presin gjithmonë udhëzime. Nëse shihni një boshllëk ose ndonjë nevojë për ndonjë përmirësim, sugjeroni një zgjidhje. Nëse një dokument është i vjetruar, ofroni të ndihmoni në përditësim.

Kërkoni ose pyesni për mundësi që të kontribuoni përtej detyrave të zakonshme. Këto veprime tregojnë jo vetëm iniciativë, por edhe përkushtim ndaj suksesit të përgjithshëm të kompanisë.

Si përfundim, fillimi i një pune të re nuk ka të bëjë me të dëshmuarit se jeni perfekt, por ka të bëjë me të treguarit se jeni i adaptueshëm dhe i përkushtuar për t’u rritur bashkë me kompaninë. Nëse i trajtoni 90 ditët e para si themel, do të krijoni momentum jo vetëm për sukses të menjëhershëm, por edhe për zhvillim afatgjatë në karrierë.