Çfarë të bëni para një interviste pune?

Më në fund ju ka ardhur ai email i shumëpritur: “Do të dëshironim t’ju ftonim në një intervistë.”Ndiheni të emocionuar por edhe me ankth dhe kjo është plotësisht normale. Një intervistë pune është më shumë sesa një bisedë rreth CV-së suaj; është momenti për të treguar mënyrën se si mendoni, komunikoni dhe përshtateni në një ekip.

Por ja e vërteta: shumica e asaj që përcakton suksesin ndodh para se të hyni në zyrën ku do te mbahet intervista. Përgatitja është ajo që e dallon një kandidat të mirë nga një kandidat i shkëlqyer.

Le ta shohim hap pas hapi se çfarë duhet të bëni para intervistës suaj të radhës për punë.

1. Hulumtoni kompaninë

Kjo mund të duket e qartë, por shumë kandidatë ende hyjnë në intervistë duke ditur vetëm emrin dhe adresën e kompanisë. Rekrutuesit e kuptojnë menjëherë.

Kaloni të paktën 30 minuta duke hulumtuar:

• Çfarë bën kompania: produktet, shërbimet, klientët dhe tregun e saj.

• Misionin dhe vlerat: zakonisht gjenden në faqen “Rreth nesh”.

• Lajmet ose arritjet e fundit: kontrolloni faqen zyrtare, profilin në LinkedIn, apo mediat lokale.

Nëse është një biznes më i vogël në Kosovë, edhe një vështrim i shpejtë në rrjetet e tyre sociale mund t’ju ndihmojë të kuptoni stilin, projektet dhe kulturën e kompanisë.

2. Kuptoni përshkrimin e pozitës

Para intervistës, lexojeni përshkrimin e punës përsëri, por më ngadalë. Nxirrni në pah shkathtësitë dhe përgjegjësitë kryesore që përmenden. Për secilën, mendoni për një shembull të shkurtër nga përvoja juaj (në punë, praktikë, vullnetarizëm apo edhe projekte universitare) që tregon se mund ta përballoni me sukses.

3. Njihni historinë tuaj

Shumica e intervistave fillojnë me të njëjtën pyetje: “Na tregoni diçka për veten.”Duket e thjeshtë, por shumë kandidatë ose flasin shumë, ose nuk thonë mjaftueshëm.

Përgatitni një version të shkurtër dhe të strukturuar të historisë suaj — rreth një minutë — që lidh përvojën tuaj me pozitën për të cilën po aplikoni.

Një formulë e mirë është:E kaluara → E tashmja → E ardhmja.

Shembull:

“Kam përfunduar studimet në administrim biznesi dhe kam filluar karrierën në mbështetje ndaj klientit, ku kam zhvilluar aftësi të forta komunikimi dhe zgjidhjeje të problemeve. Aktualisht po kërkoj një rol që më mundëson të rritem në fushën e shitjeve dhe marrëdhënieve me klientët, prandaj kjo pozitë më tërhoqi vëmendjen.”

Është e qartë, e shkurtër dhe e përshtatur me kontekstin e intervistës.

4. Përgatitni përgjigjet — por mos i mësoni përmendësh

Rishikoni pyetjet më të zakonshme të intervistave dhe mendoni paraprakisht për përgjigjet tuaja, por shmangni mësimin fjalë për fjalë. Duhet të tingëlloni që jeni përgatitur, mirëpo jo që keni mësuar përmendësh.

Disa pyetje për të cilat preferohet te reflektoni:

• Cilat janë pikat tuaja të forta dhe dobësitë?

• Pse dëshironi të punoni këtu?

• Na tregoni për një sfidë që keni përballuar në punë.

• Ku e shihni veten pas pesë vitesh?

  
  

5. Përgatitni pyetje për intervistuesin

Në fund të shumicës së intervistave, do t’ju pyesin: “A keni ndonjë pyetje për ne?”Kjo nuk është thjesht mirësjellje — është pjesë e vlerësimit. Kandidatët që bëjnë pyetje të menduara tregojnë interes të vërtetë për pozicionin.

Shmangni pyetje të përgjithshme si “Çfarë bën kompania juaj?” (atë tashmë duhet ta dini). Pyetjet më specifike tregojnë angazhim dhe kureshtje,  jo vetëm dëshirë për të marrë vendin e  punës.

6. Planifikoni detajet praktike

Kjo mund të duket e parëndësishme, por detajet bëjnë diferencën.

• Mësoni vendndodhjen e kompanisë ose vednit ku mbahet intervista

• Kontrolloni veshjen — nuk ka pse të jetë shumë formale, por duhet të jetë e pastër, e rregullt dhe e përshtatshme për mjedisin e kompanisë.

Nëse është intervistë online, kontrolloni lidhjen e internetit, kamerën dhe mikrofonin një ditë më parë. Zgjidhni një vend të qetë dhe me dritë të mirë. Lidhu pesë minuta më herët — vonesa online është po aq joprofesionale sa ajo fizike.

7. Ushtroni gjuhën e trupit dhe tonin

Fjalët kanë rëndësi, por komunikimi jo verbal shpesh flet më shumë.

Mbani një qëndrim të qetë dhe të sigurt.Buzëqeshni kur përshëndetni intervistuesin. Mbani kontakt me sy.  Shmangni kryqëzimin e duarve apo lëvizjet e tepërta sepse ato japin përshtypje pasigurie.

8. Përgatituni mentalisht

Edhe përgatitja më e mirë mund të mos japë rezultat nëse jeni tepër të stresuar. Është normale të ndiheni nervozë, por përpiquni ta ktheni atë energji në fokus.

Një natë përpara intervistës:

• Sigurohuni që të flini mjaftueshëm. Lodhja vërehet menjëherë.

• Mos e mbingarkoni veten duke përsëritur çdo pyetje. Besoni përgatitjes tuaj.

Dhe pak para intervistës, merrni disa frymëmarrje të thella. Kujtojini vetes se nuk jeni aty për të kaluar një provim, por jeni aty për të kuptuar nëse kjo punë dhe kjo kompani janë po aq të përshtatshme për ju sa jeni ju për to.

Mendime përfundimtare

Një intervistë e suksesshme fillon shumë përpara pyetjes së parë. Ajo ndërtohet mbi përgatitje — kuptimin e kompanisë, njohjen e historisë suaj, komunikimin e qartë dhe kujdesin ndaj detajeve të vogla.

Ju nuk mund t’i kontrolloni të gjitha, por mund të kontrolloni sa mirë jeni përgatitur. Dhe kjo përgatitje ju jep qetësi dhe vetëbesim, dy gjëra që lënë përshtypjen më të fortë.

Prandaj, para intervistës suaj të radhës, merrni kohën për t’u përgatitur plotësisht.